Profilaksi – Pedodonti. Është ajo pjesë e stomatologjisë që merret në mënyrë specifike jo vetëm me kurimin e dhëmbëve të fëmijëve, por në vitet e fundit i është dhënë rëndësi primare prevenimit si të kariesit ashtu dhe të problematikave të formimit të dhëmbëve dhe nofullave që nga lindja e fëmijës deri në moshën e pubertetit. Kujdesi fillon që në mënyrën e të ushqyerit me gji të fëmijës, tek përdorimi i biberonëve dhe kurimi i dhëmbëve të qumështit, për të përcaktuar një zhvillim korrekt të muskulaturës periorale dhe nofullave. Kurimi I dhëmbëve të qumështit luan një rol të rëndësishëm në ruajtjen e hapërsirave me qëllim eruptimin normal të dhëmbëve permanente në të ardhmen dhe për këtë arsye u duhet dhënë e njëjta rëndësi. Sigjilimi dhe fluorizimi janë teknika prevencioni që bëjnë të mundur respektivisht parandalimin e kariesit dhe përmirësimin cilësor të zmaltit.

Terapi Konservative – Endodonti. Baza e stomatologjisë, që fillon nga rikostruksionet më të thjeshta të kaviteteve të formuara nga proçeset karioze e deri te ato më komplekset, frakturat e dhëmbëve, defektet e ndryshme të zmaltit dhe dentinës etj. Endodontia konsiston në terapinë kanalare të dhëmbëve që kanë të nevojshme heqjen e pulpës (palcës) së dhëmbit dhe zëvendësimin e saj me materiale biokompatibël për t’i hapur rrugë më pas rindertimit të vetë dhëmbit. Me anë të teknikave endodontike realizohet gjithashtu trajtimi dhe kurimi i infeksioneve periapikale të ndryshme. Cilësia e materialeve të përdorura luajne rolin kryesor në kurimin, estetiken dhe jetëgjatësinë e mbushjeve të cilat së bashku me aftësinë e mjekut stomatolog dhe higjenës perfekte përcaktojnë cilësinë e shërbimit që i ofrohet pacientit.

Ortopedi – Protetike. Ortopedi – Protetika konsiston në aplikimin e të gjitha teknikave të nevojshme, fikse apo të lëvizshme, në zëvendësimin e dhëmbëve të munguar, në rregullimin e funksionit mastikator të pacientit si dhe përmirësimin estetik. Kjo fushë përfaqësohet nga koronat, urat dhe protezat. Koronat (kapsulat) janë zevendësim estetik dhe funksional I dhëmbëve të dëmtuar, të dobët dhe implanteve. Porcelani dhe struktura metalike; aliazh metali, zirkon apo paladium, përgjithësisht janë elementet bazë të një korone dentare, pikërisht për këtë cilësia dhe çertfikimi i ketyre materialeve janë elementi kyç i jetëgjatesisë dhe biokompatibilitetit. Urat dentare janë bashkimi i dy ose më shumë koronave dhe përdoren si zëvendësuese në rastet e mungesës së një ose më shumë dhëmbëve. Protezat, parciale ose totale, janë zëvendësime në rastet e mungesës së pjesës më të madhe të dhëmbëve. Përmiresimi i teknologjisë ka bere të mundur evoluimin e protezave klasike në ato fleksibël; më të lehta, më komode dhe mbi të gjitha nuk thyhen.

Kirurgjia Oro-Maxillo-Faciale. Kirurgjia OMF është disiplina më e specializuar e kirurgjisë në stomatologji që përfshin ndërhyrjet në heqjen e dhemballëve të pjekurisë, trajtimin e traumave, kisteve, tumoreve, keqformimeve, gjëndrave parotide dhe të pështymës, sëmundjeve kroniko-degjeneruese, infeksioneve të ndryshme etj. E cilësuar si ura lidhëse e stomatologjisë me mjekësine, mbulon të gjitha interventet në indet e buta dhe në ato të forta, në zonën e gojës dhe rreth saj, fytyrë, nofulla dhe qafë. Aftësia, eksperienca dhe kualifikimi i kirurgut OMF përcakton në mënyrë absolute mbarëvajtjen dhe sigurinë e këtyre interventeve delikate dhe komplekse, si dhe të shëndetit të pacientit në tëresi.

Implantologji. Implantet dentare përfaqësojnë teknikën kirurgjikale më inovative të zëvendësimit të një ose më shumë dhëmbëve, por edhe për ankorimin e protezave totale. Funksioni i implantit është të luajë rolin e zëvendësuesit funksional të rrënjës, duke u integruar në mënyrë natyrale me kockën për të marrë përsipër forcat gjatë përtypjes. Materialet cilësore, higjiena dhe steriliteti absolut, gjithashtu aftësia dhe eksperienca e mjekut janë faktorët primarë në mbarëvajtjen e një implanti.

Ortodonci. Ortodoncia është ajo degë e stomatologjisë që merret me studimin dhe korrigjimin e anomalive të formimit, zhvillimit dhe pozicionimit të dhëmbëve dhe nofullave, të cilat cojne në keqkafshim dhe perkeqësimin e funksionit mastikator të organit të gojës, sigurisht pa neglizhuar aspektin estetik të dhëmbëve dhe profilit facial. Qëllimi i terapisë ortodontike është të prevenojë, të eliminojë dhe përmirësojë të gjitha anomalitë, në mënyrë që të përfitojmë një rreshtim të duhur të dhëmbëve, kafshim korrekt, struktura harmonike të nofullave dhe muskulaturës së gojës për të pasur një zhvillim sa më të mirë të mundshëm. Studimet tregojnë që nevoja për ortodonci lind që në fazën e dhëmbëve të qumështit në moshë të hershme të fëmijës për të parandaluar problemin sa më herët të jetë e mundur. Është ortodoncia interceptive,ajo që cilësohet dhe si faza e parë, ajo që korrigjon të gjitha pengesat e muskulaturës orale dhe periorale, të cilat ndikojnë negativisht në zhvillimin e nofullave dhe arkatave dentare në vitet pasardhëse. Ortodoncia fikse, e cilësuar si faza e dytë, mund të realizohet në të gjitha moshat dhe konsiston në korrigjimin e defekteve dhe kafshimit, rrjeshtimin e duhur të dhëmbëve dhe përmirësimin e harmonisë faciale, me anë të forcave biomekanike të cilat realizohen nëpërmjet teknikave të ndryshme të përcaktuara nga bashkëpunimi i mjekut ortodont dhe pacientit.

Parodontologji. Është ajo pjesë specifike e stomatologjisë që trajton të gjitha problemet me mishrat e dhëmbëve, duke filluar nga gurëzat, gingiviti (irritimi i gingivave), reçesionin gingival (tërheqja e mishrave) e duke vazhduar deri tek agravimet e tyre, siç është parodontiti, sëmundja që përfshin komplet indet që mbështjellin dhe shërbejnë si suport për dhëmbin. Trajtimet janë të shumëllojshme duke filluar nga pastrimi periodik i gurëzave, lëmimi i rrënjëve e deri te ndërhyrjet kirurgjikale në rastet e nevojshme.

Estetikë. Cilësia e jetës është e barazvlefshme me cilësinë e buzëqeshjes. Duke patur parasysh këtë, estetika përmbledh në mënyrë të përgjithshme të gjitha terapitë e nevojshme me qëllimin e vetëm përftimin e një buzëqeshje perfekte të dëshiruar nga pacienti. Një sërë specialitetesh dhe teknikash të stomatologjisë vihen në dispozicion apo dhe bashkëveprojnë për të ndryshuar dhe përmirësuar ngjyrën e dhëmbëve, defekte të dhëmbëve apo indeve të buta, mungesën e tyre dhe shumë anomali të tjera që bëhen burim pakënaqësish tek pacientët. Teknikat e ndryshme të zbardhimit të dhëmbëve, mbushjet estetike, bondimet, fasetat kompozite dhe porcelani, implantet, koronat, urat e deri tek ndërhyrjet kirurgjikale, plotësojne spektrin e gjerë të shërbimeve për të arritur në një pikë të përbashkët, buzëqeshjen tuaj.